चिकित्सा विज्ञान र आयुर्वेद चिकित्सा
चिकित्सा विज्ञान र आयुर्वेद चिकित्सा शीर्षकको निबन्ध वस्तुपरक निबन्ध हो । यस निबन्धमा आधुनिक चिकित्सा विज्ञान र आयुर्वेद चिकित्सा पद्धतिका बारेमा वस्तुपरक विश्लेषण गरिएको छ । चिकित्सा विज्ञानमा एलोप्याथिक चिकित्सा र आयुर्वेद चिकित्सा दुई किसिमका उपचार पद्धति सबैभन्दा बढी प्रयोगमा छन् । एलोप्याथिक उपचार पद्धति हाल सर्वाधिक र लोकप्रिय चिकित्सा पद्धति हो । यसलाई आधुनिक चिकित्सा विज्ञानको पर्यायका रूपमा समेत चिनिन्छ । आधुनिक चिकित्सा पद्धति लोकप्रिय भए तापनि सकारात्मकसँगसँगै नकारात्मक पक्षहरू पनि रहेका छन् ।
आधुनिक चिकित्सा पद्धतिमा रोग निको पार्नका लागि सुरुमै रोग घटाउने औषधी दिइन्छ र रोग छिटो सञ्चो हुन्छ । यस उपचार पद्धतिमा विशेषज्ञ डाक्टर र औषधी सजिलै उपलब्ध हुन्छन् । मेडिकल काउन्सिल र औषधि ब्यवस्था विभागबाट स्वीकृत लिएर मात्र उपचार गर्न पाइने भएकाले यसको सङ्गठन बलियो छ । दुर्घटनामा परी अङ्गभङ्ग भएको साथै एपेन्डिसाइटिस, हृदयाघात, पक्षाघात आदि रोगबाट पीडित बिरामी, शल्यक्रियाबाट गरिने उपचार, सघन उपचार आदिमा राखेर गरिने उपचारमा आधुनिक चिकित्सा पद्धतिकै सहयोग लिनुपर्ने हुन्छ । उसरी आपतकालीन अवस्थामा गरिने एलोप्याथी औषधी उपचार धेरै प्रभावकारी सावित भएको छ । शल्यक्रियाबाट गम्भीर रोग निको पारिन्छ । प्रविधि र उपकरण समय समयमा अद्यावधि गरिने भएकाले उपचार
सहज एवं प्रभावकारी भएको छ । आधनिक उपचार पद्धतिमा साना ठुला सबै रोग निको पार्न प्रभावकारी उपचार हुन्छ । ठुलो रोग लाग्नु अगाडि नै त्यसलाई रोक्न खोपको व्यवस्था रहेको छ । गम्भीर प्रकृति र आकस्मिक बिरामीहरूको आधुनिक चिकित्सा पद्धतिबाट नै प्रभावकारी उपचार भई बिरामीको ज्यान बच्न सक्छ जुन आधुनिक चिकित्सा पद्धतिका सकारात्मक पक्षहरू हुन् । यति धेरै सकारात्मक पक्षहरू हुँदाहुँदै पनि आधुनिक चिकित्सा पद्धतिका नकारात्मक पक्षहरू पनि रहेका छन् । आधुनिक चिकित्सा पद्धतिमा दक्ष जनशक्तिको अभाव देखिन्छ । बिरामीको औषधीउपचार गर्दा एलोप्याथिक औषधीका पार्श्वप्रभाव वा नकारात्मक असरहरू देखिन्छन् । यस उपचार पद्धतिमा औषधी एवं उपचार खर्च महंगो भएकाले सर्वसाधारण गरिब वर्गका नागरिकको पहुँचभन्दा बाहिर रहेको छ । एलोप्याथिक औषधीहरू दुरूपयोग भएमा घातकसमेत हुन्छ । दीर्घकालीन रोगहरूको उपचारका क्रममा औषधीको मात्रा थप गर्नुपर्ने भएकाले रोग जटिल बन्दै जाने धन र जन दुबै क्षति हुने अवस्था पनि आउन सक्छ । औषधीहरूको मात्रा धेरै प्रयोग गर्दा थप अरू रोग थपिने सम्भावना पनि हुने जस्ता नकारात्मक पक्षहरू पनि आधुनिक चिकित्सा पद्धतिमा रहेका छन् ।
अतः वर्तमान समयमा सर्वाधिक लोकप्रिय आधुनिक चिकित्सा पद्धतिका सकारात्मकसँगै नकारात्मक पक्षहरू पनि प्रशस्तै रहेका देखिन्छन् । चिकित्सा क्षेत्रमा आयुर्वेदलगायत विभिन्न उपचार पद्धति भए पनि गम्भीर प्रकृति र आकस्मिक उपचार गर्नुपर्ने बिरामीहरूले भने एलोप्याथी एवं आधुनिक चिकित्सा पद्धतिको भर नपरी सुखै छैन । रोग लागेर उपचार गर्नुभन्दा रोग लाग्न नदिनु नै सर्वोत्तम उपाय हो । शरीरको रोगप्रतिरोधात्मक क्षमता अभिवृद्धि गर्नु नै बुद्धिमानी हो ।
